Allt á áætlun hjá hallar-feðgum

Eins og flestir Álftnesingar og vonandi allir Sótafélagar hafa tekið eftir þá rís reiðhöllin okkar hratt þessa dagana.  Feðgarnir Guðmundur Böðvarsson og synir hans Tómas og Böðvar tóku að sér að púsla og reisa stálgrindarhúsið sem kemur frá Merkúr-Hýsi.  Vefstjóri Sóta tók hús á þeim feðgum í enn einu fallegu sólarlagi á Álftanesi á dögunum og spurði frétta. 

Hvernig hefur framkvæmdin gengið hingað til?
,,Það hefur bara gengið vel og þetta hefur verið skemmtileg vinna. Að vísu ætluðum við okkur að vera komnir lengra en þetta hefur verið miklu meiri vinna en við bjuggumst við.  Ég (Guðmundur) hef reist mörg límtrés- og stálgrindarhús en þetta er það flóknasta hingað til. Það hefur verið mikið púsl að setja þetta saman og miljón skrúfur!   Ætli við verðum ekki sérfræðingar í stálgrindarhúsum þegar þetta er búið!“

Hvenær verður verkinu ykkar lokið?
,,Skv samningi eigum við að skila þessu tilbúið að utan í lok september.  Við reynum að láta það standast. Þá á eftir að innrétta höllina, setja gólfefni ofl en þá verða sjálfboðaliðar kallaðir til“

​Þeir feðgar hafa verið duglegir að taka myndir á hinum ýmsu stigum verksins og tala myndirnar sínu máli. Sjá má margar glæsilegar myndir hjá Guðmundi og Böðvari.  Enda varð Tómasi á orði að kannski væri þeir á rangri hillu, þeir ættu kannski frekar að leggja ljósmyndun fyrir sig? 

Við hin í Sóta getum a.m.k hlakkað til haustsins og vetrarins.  Spennandi tímar í vændum!